هوما يقولو رمضان جاء وانا نتفجع

وراس خدمتي لعزيزة الغالية وراس ولادي الّي ضيّغة عليهم عمري وشبابي ومازلة في شطر الثنيّ معاهم: يا كيف نسمعهم يحكيو على رمضان ويقولو:" لا اش مازّالو؟ - هوّنوّ علّبواب. الله مصلي عنّبيّ. –شهر فضيل ما تخمّمشي رمضان ابركتو........" وهاة من هكلحد يث الي يكسر الكرايم ويخلي الواحد والّا الوحدة كيفي انا تهبل وتخرج من سينتها....
وباش مانحكيش علّعباد هاني باش نحكي على روحي وعلا راجلي:
أنا عمري ما صمت بلكل بلكل وهذا أمر حسمت فيه من وينك وهذا عمرو ما قلقني حتا طرف وبقلا للّي مايحبّش يفهم . أما راجلي لعزيز عليّا وللي شادد عليّا اسما لطّيح فوق راسي يقول للعباد الي هو صايم وهو فلحقيقة ما ياكل حتّاشي أما مصيبتو فدّخّان هو كيّنو صايم أما يتكيّف و يتكيّف ويتكيّف ...........
هذا كلو أمر يخصو وحدو علا خاطر قد ما حكية معاه ما نجمشي يلقا في روحو العزيمة الكافية باش يبطل الدخّان كيفما عملة أنا تويّك سنين.
لوكان لحكاية تقف لهنا راني ما فكرتش باش اندون عليها, المصيبة وأنّو راجلي في رمضان يولّي يروح بكري لدّار علاخاطر القهاوي مسكر ويبدا عاد يجيب ويقضي ويكركر علا غير العادة {فلعادة أنا الّي نقضي كل شي وحدي وهو ما يروح كان الّليل اللّيل حتّا يشبع ملقعد مع أصحابو فلقهو }ويجي ويتنصبلي فالصالة من قبل المغرب بسوايع ويبدا يتفرج فتّلفزة ويتبع المسلسلاة التافه متع رمضان الكل الّي تجي قبل البارود والّي بعدو زادا – امّالة يفلّة حاج منهم كيفاش وشنوّ باش يحكي غدو يلزمو يكون "ألاباج" ويزيد يلم لولاد بحذاه باش يتونّس بيهم ويعلقو علمسلسل وأنا وبنتي نبداو عاد مقطعين فلكوجينة {نورمال هذهية العادة والعوايد } .
وبعد العشاء نبد أنا فلكوجينة نغسل فلماعون ولقضية ما توفاش أبدا وحنا هكّاك ينوقز تليفون راجلي ويعيطولو اصحابو باش يمشيو مبعضهم للنادي الثقافي متاع التّوانسة " القهوة"ويمشي معاهم حتا لآخر اللّيل حصيلو كيف يروح نكونو أنا وولادي في أغلب ليّام رقدنا . هكاكة علا هلمعد نعديو رمضان كامل.
ملاخظة بسيطة: براس أمّك كان تحب تعلّق باش تسبّ سبني أنا أمّا ما تسبليشي راجلي علا خاطرو سادد عليّا باب ابلا في هل مجتمع ال........ منجّمشي انقولها علا خاطر متعودشي علا التعرعير ونحترم الناس الكل وما نسب كان "ربيّ".